IR. H. SOEKIRMAN NGADANI GELAR SENI BUDAYA SERGAI ING KABUPATEN ACEH TIMUR

Jokya, Sumut24.co

Baca Juga:

• Wakil Wali Kota Tanjungbalai Pastikan Stok Beras Aman, Bulog Siapkan Cadangan hingga Enam Bulan
• Wali Kota Tanjungbalai dan Demokrat Perkuat Kolaborasi Gerakan Indonesia ASRI, Dorong Kepedulian Lingkungan
• Dokter PPDS FK USU Jalani Pengabdian di Nias Utara, Ungkap Tantangan Layanan Kesehatan

Dening: Dr. Purwadi, M.Hum Ketua Lembaga Olah Kajian Nusantara LOKANTARA

Rum kuncaraning bangsa dumunung hing luhuring budaya. Rikala dina Senin, 2 Maret 2020 ana prastawa agung kang dicathet dening sejarah kebudayaan. Sambang sambung srawung anjalari tepung lan dunung. Kanthi nggelar seni budaya diajab tuwuh rasa pangerten, tepa salira lan mawas dhiri.

Lumantar seni edi peni budaya adi luhung, saben manungsa nduweni angen-angen kang awujud rerenggan endah. Gandheng saka kuwi, Pemerintah Kabupaten Serdang Bedagai Sumatera Utara nganakake pentas seni budaya ing kutha Idi Kabupaten Aceh Timur. Sing mandhegani Bapak Ir H Soekirman Bupati Serdang Bedagai utawa Sergai. Panjenengane misuwur pimpinan daerah kang titis ing samukawis. Seneng ngarang buku, baut nembang, micara miraga. Jeneng lumrah karana Ir H Soekirman iku leluhur saka Tanah Jawa, yaiku ing Kabupaten Purworejo. Saiki uga nyengkuyung hadeging Pujakesuma utawa Paguyuban putra Jawa kelahiran Sumatera.

Kepareng ndherek nyengkuyung ing pahargyan iki Bapak Drs Joni Walker Manik MM, Kepala Dinas Pendidikan Sergai. Uga Bapak Sudarno minangka Kepala Dinas Pemuda Olahraga, Pariwisata dan Budaya. Nyambut gawe bebarengan antarane Pemkab Sergai karo Pemkab Aceh Timur sanyata budaya luwih katon tumangkar ngrembaka lan ngrembuyung. Beda bedane adat, basa, agama tetep nyawiji jroning mbangun negara, murih mulyaning praja.

Rombongan lumaku wiwit Kabupaten Sergai ngliwati Deli Serdang, Medan, Binjai, Langkat, kota Lungsa lan Aceh Timur. Sadalan-dalan katon sesawangan kang ijo royo-royo. Kebun kelapa sawit pating trucuk kaya megaring jamur barat. Kelapa sawit lambang kemakmuran. Saben tahun wohing bisa diundhuh. Asil tikel-matikel bisa kanggo sarana mrih gancaring pembangunan.

Wiwit dina Minggu 1 Maret 2020 para paraga wis sengkut gumregut gladhen. Dheweke pengin nggelar kabisan saapik apike. Yen tata lahir nyuguh seni sing gawe sengsem kang mulat. Tukar seni budaya Pemkab Sergai lan Pemkab Aceh Timur mujudake piranti kang nyupeketake kekadangan, ngraketake memitran. Regenging gelar seni uga kasengkuyung dening tokoh temu kangen bapak Haji Poniman. Panjenengane ngesuhi uga Paguyuban Suko Budoyo.

Wondene ingkang kagungan dalem utawa tuan rumah rumangsa bombong ing penggalih. Bapak Rocky Linud Bupati Aceh Timur katon bingah sumringah. Panjenengane pikantuk tamu agung. Suwasana kutha Idi Kabupaten Aceh Timur sangsaya gumyak, grapyak, sumanak, kepenak, lan sigrak. Iki nuduhake yen seni budaya dadi saka guru jatidiri bangsa.

Tengku Hasballah M Thaib utawa Rocky dadi Bupati Aceh Timur sing seneng olah gelaring seni budaya. Nanggro Aceh Darussalam wilayah kang lila legawa lelandhesan sesanti Bhinneka Tunggal Ika. Diplomasi kebudayaan ditindakake kanthi tumemen lan permati. Kabupaten Aceh Timur sing mbangun adhedhasar kapribaden luhur.

Murih gancaring pagelaran tim seni nindakake rembugan mirunggan. Dina Senin 2 maret 2020 mapan ing bale palereman Bupati Soekirman mandhegani paheman. Wosing rembug kabeh paraga wis samapta ing gati sawega ing dhiri. Mas Guntoro dandan wujud Gathutkaca. Kanca-kancane dhapuk bala wanara. Anoman, Anila, Anggada, Sugriwa, Jembawan wadya rewanda negara Guwa Kiskendha. Saperangan kanca putri dhapuk paraga manten. Pasugatan seni tim Sergai kudu merak ati.

Pendopo kota Idi Kabupaten Aceh Timur duwe gawe gedhe. Tari Saman, tari Seudati, busana adat Aceh, binarung swarane terbangan. Swasana dadi wibawa, Agung lan regeng. Ir H Soekirman Bupati Sergai lan rombongan dicaosi pasugatan seni Aceh sing edi peni. Busana pating gumebyar sumorot agawe cingak kang mirsani.

Utusan tim seni Sergai caos pasugatan tari Manten, tari Panen, tari Karo lan tari Petilan Ramayana. Keplok mbata rubuh para rawuh kepranan ing galih. Seni Jawa, Melayu, Batak lan Aceh pentas berbarengan. Sing mirsani padha suka parisuka.

Karumpaka dening, Dr. Purwadi, M.Hum. 15 Juli 2020. Ketua Lembaga Olah Kajian Nusantara (LOKANTARA), Jl. Kakap raya 36 Minomartani, Yogyakarta. Hp: 0878 6440 4347

Rel

Ayo baca konten menarik lainnya dan follow kami di Google News

Wakil Wali Kota Tanjungbalai Pastikan Stok Beras Aman, Bulog Siapkan Cadangan hingga Enam Bulan

Wali Kota Tanjungbalai dan Demokrat Perkuat Kolaborasi Gerakan Indonesia ASRI, Dorong Kepedulian Lingkungan

Dokter PPDS FK USU Jalani Pengabdian di Nias Utara, Ungkap Tantangan Layanan Kesehatan

Wakil Bupati Asahan Dukung Penuh Jamda XI Pramuka Sumut, Wadah Lahirkan Pemuda Berkarakter dan Berjiwa Pemimpin

Resmi Dimulai! Bupati Madina Saipullah Nasution Canangkan Bedah 505 Rumah, Target 5.000 Unit Selama Era Prabowo

Pesan Tegas Wabup Paluta Saat Lantik 6 Pejabat: Buktikan Amanah dengan Kinerja, Bukan Sekadar Jabatan