Babad Tegal Arum

Tegal | Sumut24.co

Baca Juga:

• BABAD IMOGIRI

Babad Tegal Arum murwakani,
Konjuk Kanjeng Sunan Amangkurat,
Raja binathara gedhe,
Misuwur budi luhur,
Tatas titis ing samukawis,
Mrantasi barang karya,
Ber bandha ber bandhu,
Ngereh ing nagri Mataram,
Asah asih asuh mring kawula dasih,
Sampun kondhang kaloka.

Kocap Kanjeng Sunan Tegalwangi,
Tedhak Kraton Demak Bintara,
Ganda melathi rinonce,
Angambar sarwa arum,
Wulang wuruk ing Tanah Jawi,
Lumantar Wali Sanga,
Terang mbabar kawruh,
Jaka Tingkir Kraton Pajang,
Mandhegani murih basuki lestari,
Nama Joko Kahiman.

Papan asri ing sukuning hardi,
Gunung Slamet yekti tata harja,
Sawab Ratu kang sumare,
Sri Amangkurat Agung,
Mula becik wigatekna,
Nyuwun donga restu,
Antuk drajat pangkat semat,
Putra putri nggayuh kamulyan sejati,
Tindakna saben warsi.

2.
Kinanthi

Joko Kahiman satuhu,
Titis wasis samukawis,
Atmaja Sunan Prawata,
Kinen jumeneng Bupati,
Pangarsa tlatah Banyumas,
Dhawuh raja ing Mentawis.

Kanjeng Sunan Tegal Arum,
Pundhen aneng Tanah Jawi,
Nadyan sampun puput yuswa,
Surud ing kasedan jati,
Jiwa ragane sampurna,
Cihna priyagung pinilih.

3.
Mijil

Bupati sigra sengkut makarti,
Manunggal gumolong,
Cipta rasa karsa karya gedhe,
Linambaran pakarti pekerti,
Banyumas sejati,
Lila guyub rukun.

Sagung putra wayah saben warsi,
Sungkem mring sang katong,
Nyuwun lilah puji enjang sore,
Amangkurat narendra Mentawis,
Suci lahir batin,
Suka sabar sujud.

4.
Gambuh

Bangunan saka kayu,
Ing pangajab pikantuk rahayu,
Amangkurat Kanjeng Ratu Wiratsari,
Banyumas tambah ngrembuyung,
Suka gembira rinaos.

Sri Amangkurat Agung,
Suka sukur mujur subur makmur,
Siyang ratri dana driyah mbanyu mili,
Bebrayan tulung tinulung,
Tlatah Tegal bakoh awoh.

5.
Pangkur

Para Bupati Banyumas,
Golong gilig arsa mbangun negari,
Dhawuh Amangkurat Agung,
Nuhoni Ratu Kencana,
Mrih rahayu iline kali Serayu,
Angocori sawah sawah,
Tela pohung jagung pari.

Wilayah Tegal kaloka,
Tani lancar tukang dagangan laris,
Saben pojok adeg warung,
Enak regane murah,
Pancen perlu nulad Amangkurat Prabu,
Tumrap warga nusantara,
Bekti mring ibu pertiwi.

6.
Asmarandana

Kanjeng Ratu Wiratsari,
Prameswari Amangkurat,
Yasa Kedhaton Pamase,
Ambangun tlatah Banyumas,
Ing Lesmana Ajibarang,
Mahargya Ratu Serayu,
Kadang tani among dagang.

Ratu Kencana winasis,
Prameswari Amangkurat,
Aneng Tegal wus Sumare,
Ndherek narendra Mataram,
Labuh labet jiwa raga,
Wanita ayu rahayu,
Minangka tepa tuladha.

7.
Pucung

Alun alun papan amba kebak purun,
Aneng Purwakerta,
Among dagang laris manis,
Amangkurat paring cahya kang sumirat.

Kanjeng Ratu Ayu Kencana Serayu,
Turun dharah Pajang,
Wayang raja Jaka Tingkir,
Trah kusuma rembesing madu sanyata.

8.
Megatruh

Sarwa luhur Banyumas wilayah subur,
Kabawah kraton Mentawis,
Raja Amangkurat Agung,
Sarta Ratu Wiratsari,
Pura Pamase mencorong.

Sigra mikir abdi dalem para ratu,
Tata cara saben warsi,
Upacara Tegal Arum,
Ganti langse enggal becik,
Ngalap berkahe sang katong.

9.
Pucung

Desa gunung seni tumangkar ngrembuyung,
Wilayah Banyumas,
Kanjeng Ratu Wiratsari,
Amangkurat nata agung hayuningrat.

Yen kadulu sagung pendherek lumintu,
Sowan Amangkurat,
Pajimatan Tegal Wangi,
Ngalap berkah dimen uripe sumarah.

10.
Kinanthi

Lumaku toya Serayu,
Kinclong kinclong sarwa bening,
Kanjeng Sunan Amangkurat,
Sesarengan prameswari,
Nyawang gunung Slamet endah,
Banyumas kang edi peni.

Tlatah Tegal ngisor gunung,
Kali Gung ngileni sabin,
Pala pendhem pala wija,
Pala gandhul pala kitri,
Pala tempel pala simpar,
Gemah ripah loh jinawi.

11.
Pangkur

Dhatulaya Ajibarang,
Papan sumber emas kencana rukmi,
Nata Amangkurat Agung,
Wiratsari kang garwa,
Paring dhawuh mrih Banyumas wutuh tangguh,
Kuwat drajat pangkat semat,
Sugih bandha bandhu budi.

Ndherek jamasan pusaka,
Pajimatan suci ing Tegal Wangi,
Wulan Sura pancen perlu,
Mesu budi tirakat,
Dimen mujur sluman slumun tambah makmur,
Lara lapa tapa brata,
Panggraita landhep lantip.

12.
Pucung

Ing Serayu kali ayu lan rahayu,
Sunan Amangkurat,
Tapa kungkum tapa ngeli,
Mesu jiwa anoraga cipta rasa.

Manjing gunung ing pangangkah jiwa agung,
Nlasak wana wasa,
Tumuruning jurang terbis,
Midering rat ngudi drajat pangkat semat.

13.
Sinom

Garwa dalem Amangkurat,
Kanjeng Ratu Wiratsari,
Katelah Ratu Kencana,
Tedhak turun Jaka Tingkir,
Nyata putri linuwih,
Sinebut Ratu Serayu,
Mbangun nagri Mataram,
Gemah ripah loh jinawi,
Wiwit brang wetan nganti tekan Madura.

Pajimatan Amangkurat,
Bumi Tegal tanah becik,
Pepundhen ing tanah Jawa,
Angleluri amberkahi,
Tata cara prayogi,
Andherek kanthi tuwajuh,
Ulat patrap pangucap,
Jumbuh keplok lahir batin,
Pisowanan bareng aneng pajimatan.

14.
Maskumambang

Bungah susah yekti gawane ngaurip,
Kawula tlatah Banyumas,
Mersudi luhuring budi,
Suwita Kraton Mataram.

Sowan aneng pajimatan Tegal Wangi,
Sekar wor kukusing dupa,
Atur puji pangastuti,
Panuwunan kasembadan.

15.
Durma

Tuking rukmi aneng desa Pancurendhang,
Rajabrana mas micis,
Sumber penghasilan,
Tumrap praja Mataram,
Mbudidaya Wiratsari,
Sri Amangkurat,
Mersudi urup urip.

Tegal Arum ganda wangi mbabar suka,
Saking kehing pra janmi,
Nembe pisowanan,
Pajimatan Amangkurat,
Amrih sandhang boga ndalidir,
Matumpuk tumpa,
Ayem tentrem ing ati.

16.
Gambuh

Papan kidul pununjul,
Gunung Slamet agung kaya payung, Ambawahi wilayah Banyumas kang peni,
Amangkurat terus ambangun,
Sigrak gumyak gotong royong.

Jeng Sunan Tegal Arum,
Narendra gung winasis linangkung,
Binathara mbahu dhendha nyakrawati,
Ngeli ing Kali Serayu,
Banyumas mbangun kedhaton.

17.
Pangkur

Jeng Pangran Kajor kocap,
Sentana kang sugih inten mas picis,
Bandha bandhu tanah mbrewu,
Tedhak Pangeran Benawa,
Wus misuwur trah Pajang kang makmur,
Wiratsari ingkang putra,
Ginarwa Sri Amangkurat.

Trah Pangeran Benawa,
Pamanahan Pati Juru Martani,
Ratu Kencana Mas Panggung,
Tetungguling wanita,
Amangkurat Agung tumerah ngrembuyung,
Ambawahi Tanah Jawa,
Sangsaya kuncara becik.

18.
Dhandhanggula

Guru bangsa mbabar wiyatadi,
Kawentar Pangeran Karanggayam,
Saking wilayah Kebumen,
Pituduh barang kawruh,
Paugeran tata negari,
Peprentahan bebrayan,
Pandoming pandulu,
Jeng Sultan Hadiwijaya,
Paring dhawuh murih rahayu lestari,
Pujangga Kraton Pajang.

Sagung warga tlatah Tegal Wangi,
Wajib bekti Sunan Amangkurat,
Minangka pepundhen gedhe,
Berkah nuli sumawur,
Bakul bathi tanduran semi,
Ama sumingkir ilang,
Tanem tuwuh subur,
Ngrembuyung agrom ngrembaka,
Kadang tani gumregut nggone makarti,
Gancar pangupa jiwa.

19.
Pangkur

Kaloka Sri Ratu Batang,
Ing Mataram minangka prameswari,
Garwanipun Sultan Agung,
Miyos Sri Amangkurat,
Sampun purun tlatah Banyumas binangun,
Narendra gung binathara,
Mbahu dhendha nyakrawati.

Putra wayah Amangkurat,
Sowan para luhur langkung prayogi,
Nitik lelakon kepungkur,
Warisan nenek moyang,
Pareng ndulu madhep mantep jroning kalbu,
Suminar byar terawangan,
Cahya padhang anelahi,

20.
Kinanthi

Kanjeng Ratu Mas Serayu,
Pinilih putri linuwih,
Atmaja Joko Kahiman,
Hupasanta malakrami,
Miyos Kanjeng Ratu Batang,
Sultan Agung ing Mentawis.

Dhasar priyayi linangkung,
Sanyata trahing kusuma,
Rembesing madu sing asli,
Wijining amara tapa,
Tedhaking andana warih.

21.
Dhandhanggula

Pantes luwes kinarya palupi,
Labuh labet raja Amangkurat,
Yasa Kedhaton Pamase,
Sayekti tangguh ampuh,
Mbangun jaman kencana rukmi,
Lesmana Ajibarang,
Pancurendhang mancur,
Emas picis rajabrana,
Bandha bandhu budi linangkung utami,
Kanjeng Ratu Kencana.

Upacara manut titi wanci,
Jamasan pusaka kaleksanan,
Kanthi sumarah sumendhe,
Sri Amangkurat Agung,
Wus Sumare ing Tegal Wangi,
Sasana pajimatan,
Sarana nenuwun,
Ngudi drajat pangkat semat,
Wenang wening kinarya pangeling eling,
Dhiri nampa nugraha.

Purwadi,
Ketua Lokantara
HP 087864404347

Rel

Ayo baca konten menarik lainnya dan follow kami di Google News

BABAD IMOGIRI